ଯେଉଁଠି ଥିଲେ ବି ଆମେ ଓଡ଼ିଆ
ଡାକ୍ତର
ଆଦିତ୍ୟ ସାମଲ
ଓଡ଼ିଆ| ଏହା
କେବଳ ଏକ ଭାଷାର ନାମ ନୁହେଁ|
ଏକ ସ୍ବାଭିମାନ -ଏକ ଜାତିର ନାମ| ସେ କୁଣିଆଁ ପ୍ରିୟ, ଶାନ୍ତ, ସରଳ
ଜାତିଟିଏ| ଯାହାପାଇଁ ଏକ ମଧୁର ଆକ୍ଷେପ ରହିଥାଏ - ଓଡ଼ିଆ ଭାରି ଗାଁ ପ୍ରିୟ -ଘର ପ୍ରିୟ| ଏଥିପାଇଁ
ସେ ଦୁନିଆଁର ଦୌଡରେ ସାମିଲ ହୁଏ ନାହିଁ|
ପଖାଳ ସହିତ ଶାଗ, ଭଜା
ଟିକେ ହେଲେ - ତା’ର ଭାରିଶାନ୍ତି|
କାହା ସହିତ ସେ ଯୁକ୍ତିତର୍କ କରେ ନାହିଁ| ବିଶ୍ବପ୍ରସିଦ୍ଧ
ସମ୍ବଲପୁରୀ ଶାଢ଼ି,
ସୁନାରୂପାର ତାରକସୀ କାମ, ଜଗତର ନାଥ - ଶ୍ରୀ ଜଗନ୍ନାଥଙ୍କ
ଉପସ୍ଥିତି, ତଥା ବିଭିନ୍ନ କିସମର ସ୍ବାଦିଷ୍ଟ ଖାଦ୍ୟର ବ୍ୟବହାର ଥିବା ସତ୍ତ୍ବେ ସେ ଦି’ପାଦ
ଆଗକୁ ଆଗେଇ ଯାଇ ଅନ୍ୟ ପାଖରେ ନିଜକୁ ଉପସ୍ଥାପିତ କରିପାରନ୍ତି ନାହିଁ| ଏହାକୁ
କିଛିଟା ପଛୁଆଗୁଣ କହିଲେ ବି ସେଇଟା ତା’ର ଗୋଟେ ମୌଳିକ ଗୁଣ|
ବର୍ତ୍ତମାନ
ଚିକିତ୍ସାବିଜ୍ଞାନ ତଥା ଆଇ.ଟି ଶିକ୍ଷାର ବହୁଳ ବ୍ୟବହାର ଫଳରେ ବିଶ୍ବ ‘ବସୁଧୈବ
କୁଟୁମ୍ବକମ୍’ ନୀତିକୁ ଅନୁସରଣ କରି ଏକ ବିଶାଳ ଗୃହରେ ପରିବର୍ତ୍ତିତ ହୋଇଯାଇଛି| ତେଣୁ
ଓଡ଼ିଆ ବି ଆଜି ଘରଦ୍ବାର ଛାଡି ଦେଶ ବିଦେଶରେ ରହି, ସେଠାକାର ଖାଦ୍ୟ, ଭାଷା ଓ ଚଳଣି ସହିତ ଖାପଖୁଆଇ
ଚଳିବା ଆରମ୍ଭ କରି ଦେଲାଣି|
ଅନ୍ୟଦେଶ ତୁଳନାରେ ଏ
ଦିଗରେ ଆମେରିକାରେ ଏହାର ସଂଖ୍ୟା ସର୍ବାଧିକ| ବିଶେଷ କରି ବିଭିନ୍ନ ସପିଂମଲ୍
ଅଥବା ଶ୍ରୀ ଜଗନ୍ନାଥ ମନ୍ଦିର ବେଢ଼ାରେ ଓଡ଼ିଆମାନଙ୍କର ପରିଚୟ ମିଳିଯାଏ| ସେ
କୋରାପୁଟର ଲୋକ ହେଉ,
କି କଳାହାଣ୍ଡିର ଲୋକ ହେଉ, ସେ ସମ୍ବଲପୁରର ଲୋକ ହେଉ କି
ସୁନ୍ଦରଗଡର ଲୋକ ହେଉ,
ହଠାତ୍ ଓଡ଼ିଆ କଥା ପଦେ ଶୁଣିଦେଲେ ମନରେ ଚମକ ଖେଳିଯାଏ| ମନେ
ହୁଏ - ସେମାନେ ସବୁ ଯେମିତି ଗୋଟିଏ ସାହିର ଲୋକ, ଗୋଟିଏ ପଡା ଲୋକ| ଯେମିତି
ପଡୋଶୀ|
ହଠାତ୍ ପରିଚିତ
ହୋଇଗଲା ପରେ - ଆରମ୍ଭ ହୋଇଯାଏ “କେଉଁଠି ରହୁଛନ୍ତି ?
ମୋବାଇଲ୍ ଫୋନ୍ ନମ୍ବର କେତେ ? ଆଉ
ସବୁ ଓଡ଼ିଆ କିଏ କିଏ ଅଛନ୍ତି ?” ଇତ୍ୟାଦି ଇତ୍ୟାଦି| ପରେ
ପରେ ଫୋନ୍ରେ ଚାଲେ ସୁଖ-ଦୁଃଖର ଖବର| ଓଡ଼ିଆ କ୍ଲବ ବା ସୋସାଇଟିର
ମେମ୍ବର ସଂଖ୍ୟା ବଢ଼ିଯାଏ|
ଓଡ଼ିଆ ପୁନେଇ ପରବ ହେଲେ, ପାଞ୍ଜି ଲୋଡା ପଡିଲେ, ଜନ୍ମଦିନ
କି ବିବାହ ବାର୍ଷିକୀ ହେଲେ,
‘ଲଙ୍କାରେ ହରି ଶବ୍ଦ’ ପରି ପୁଣି ଚାଲେ- ଓଡ଼ିଆ ଭାଷାର
ଆର୍କେଷ୍ଟ୍ରା|
ଗୁଣୁ ଗୁଣୁ ଓଡିଆ ଗୀତ, ଭଜନ, ଆଧୁନିକ
କିମ୍ବା ମଜାକଥା|
ମୁଁ ଆଉ ମୋ ଧର୍ମପତ୍ନୀ
(ଯାମିନୀ) ଦୁଇଜଣ ଯାକ ଡାକ୍ତର ଅଛୁଁ ଆମେରିକାର ହୋଷ୍ଟନରେ| ଏଠି ମୋର ରହିବାର କେତେ
ବର୍ଷ ହୋଇଗଲାଣି|
ମୁଁ ଚିକିତ୍ସା କ୍ଷେତ୍ରରେ ଥିବାରୁ ଅଧିକ ସମୟ ବାହାରେ କଟାଇ ହୁଏନା| ତଥାପି, ଆମ
ଘର ପାଖ ‘ଓଡ଼ିଆ କ୍ଲବ’
ଶନିବାର ଆଉ ରବିବାର ଦିନ ଯେଉଁ ବନ୍ଧୁ ମିଳନ ବୈଠକ ସଭା ଆଦି ହୁଏ
ତାକୁ ଆମେ ହାତ ଛଡ଼ା କରିପାରୁନା| ଯଦି ଏହା ହାତ ଛଡ଼ା ହୋଇଯାଏ, ତେବେ
ମନଟା ଗୁଡେଇ ତୁଡେଇ ହୁଏ|
ଯେମିତି କିଛି ଗୋଟେ ହଜିଯାଇଛି| ମନଟା ସେମିତି ଖାଁ ଖାଁ
ଲାଗେ| ବୋଧ ହୁଏ ସେଇ ମନଟା - ଜଣେ ଓଡ଼ିଆର ‘ଓଡ଼ିଆ କ୍ଲବ’ରେ
ଏକାଠି ହେବାର ଆଉ ଗୋଟେ ବି କାରଣ ଅଛି| ପ୍ରତି ଓଡ଼ିଆ ପରିବାରକୁ ଆସନ୍ତା ଥର ପାଇଁ
ଗୋଟେ ନୂଆ ଆଇଟମ୍ର ଖାଦ୍ୟ ପ୍ରସ୍ତୁତ କରି
ଆଣିବାକୁ ଦାୟିତ୍ବ ଦିଆଯାଇଥାଏ|
ତେଣୁ ‘ବନ୍ଧୁ ମିଳନ’ରେ
ଓଡ଼ିଶାର ପାରମ୍ପରିକ ଖାଦ୍ୟ ସବୁ ଚାଖିବାର ସୁଯୋଗ ମିଳେ ଆମ ସମସ୍ତକୁ| ସୋରିଷ
ଦେଇ ମାଛ ଝୋଳ,
ଡାଲମା, ଶାଗ, ବଡି ଭଜା, ଆଳୁପରିବା
ଓଡ଼ିଶାର ବିଶେଷ ସ୍ବାଦର ମାଂସ ଝୋଳ ସାଙ୍ଗକୁ ବନ୍ଧାକୋବି - ମାଛମୁଣ୍ଡର ଘାଣ୍ଟ ଖାଇଲାବେଳେ ଆମକୁ
ଲାଗେ, ଆମେ ଆଉ ସାତ ସମୁଦ୍ର - ତେର ନଈ ପାରି ବିଦେଶରେ ନାହୁଁ - ଆମେ ଅଛୁଁ ଆମ ଓଡ଼ିଶାର ନଦୀବନ୍ଧ
ଘେରା ଏକ ଗାଁରେ|
ତେଣୁ, କେହି ପ୍ରାୟ ଏହି ଅପୂର୍ବ ସୁଯୋଗ ହାତଛଡ଼ା
କରନ୍ତି ନାହିଁ|
ଆମେରିକାର ଉତ୍ତମ
ଜଳବାୟୁ, ପରିଷ୍କାର ପରିଚ୍ଛନ୍ନତା,
ସମୟାନୁବର୍ତ୍ତିତା ଜୀବନ, ତା ସହିତ ମନଲୋଭା ଦରମା ଏ ସବୁର
ଲୋଭକୁ ଏକବାରେ ଛାଡିଦେଇ ହୁଏନା| ତଥାପି ଆମ ଗାଁ, ଆମ
ଜିଲ୍ଲା, ଆମ ଓଡ଼ିଶାକୁ ଝୁରିହେଉଁ|
ବରଫ ପଡ଼ୁଥିବା ଦିନରେ
ଗାଡି ଉପରୁ ଆଉ ଘର ସାମ୍ନାରୁ ହାତରେ ବରଫ ସଫା କଲା ବେଳେ, ବରଫ ଝଡକୁ ଅତିକ୍ରମ କରି ଡାକ୍ତରଖାନାକୁ ଡିଉଟି କରିବାକୁ
ଯିବାବେଳେ, ବିଶେଷ କରି ଏକଲା ଜୀବନ କଟାଉଥିବା ଅସହାୟ ବୃଦ୍ଧ-ବୃଦ୍ଧାମାନଙ୍କୁ ଦେଖିଲା ବେଳେ ମନଟା
ଚାଲିଯାଏ| ଆମ ଓଡ଼ିଶାକୁ - ଆମ ଗାଁକୁ | ପଲ୍ଲୀର
ସେହି ଗାର୍ହସ୍ଥ୍ୟ ଜୀବନ ସାଙ୍ଗକୁ ଯୌଥ ପରିବାର ଜୀବନ କଥା ମନେ ପଡିଯାଏ| ମନ
ଭିତରୁ କିଏ ଯେମିତି ତୁହାଇ ତୁହାଇ କହି ଉଠେ - “ ନା ଏଠି ଆଉ ଅଧିକ ଦିନ ରହି ହେବନି|” ପରିବାରର ଗୁରୁଜନ ଓ ଲଘୁଜନମାନେ ଭାରି ମନେପଡ଼ନ୍ତି| ଅବଶ୍ୟ ବର୍ତ୍ତମାନର ‘ଜଗତିକରଣ’ (Globalisation) ଯୁଗରେ ପୃଥିବୀର ଅଧିକାଂଶ ଦେଶର ଚଳଣି ପ୍ରାୟ ଏହି ପ୍ରକାର ହୋଇ ଆସିଲାଣି|
ଆମ ଦୁଇଜଣଙ୍କ (ମୁଁ ଓ
ମୋ ସ୍ତ୍ରୀ)ଙ୍କ ପେଷା ତଥା ପିଲାଙ୍କ ପାଠପଢ଼ା ଯୋଗୁଁ ଆମ ପକ୍ଷରେ ଓଡ଼ିଶା ଫେରିବା ସଂଭବ ନୁହେଁ| ହେଲେ
ଓଡ଼ିଶା ପ୍ରତି ମୋର ଆକର୍ଷଣ ଏତେ ଯେ ମୁଁ ବର୍ଷକୁ ଦୁଇଥର ଯିବାର ବ୍ୟବସ୍ଥା କରିଥାଏ| ଯେଉଁ
କେତେଦିନ ମୁଁ ସେଠାରେ ରୁହେଁ,
ସେହି କେତେଦିନ ମୁଁ ସ୍ବର୍ଗରେ ରହିଲା ପରି ଲାଗେ| ଗାଁର
ମନ୍ଦିର, ପୋଖରୀ,
ହାଟବଜାର ସାଙ୍ଗକୁ ହରଗାଁର ଲହରିଆ ଶଙ୍ଖଧ୍ବନି! ଆଃ -!! ସେତେବେଳେ
ମୁଁ ଭାବେ - ସତରେ ‘ଜନନୀ ଜନ୍ମଭୂମିଶ୍ଚ - ସ୍ବର୍ଗାଦପି ଗରୀୟସୀ
ଆମ ଓଡ଼ିଆମାନଙ୍କର ବଡ
ଠାକୁର ହେଲେ ଶ୍ରୀ ଜଗନ୍ନାଥ ମହାପ୍ରଭୁ| ତେଣୁ ବିଦେଶରେ ଯେଉଁଠି
ଓଡ଼ିଆମାନେ ରହନ୍ତି ସେଠାରେ ଶ୍ରୀଜଗନ୍ନାଥ ମନ୍ଦିରଟିଏ ନିର୍ମାଣ କରିଥାନ୍ତି| ଆମର
ବି ଏଠାରେ ସେଇଆ ହୋଇଛି|
ମୁଁ ମଧ୍ୟ ହୋଷ୍ଟନରେ ମହପ୍ରଭୁ ଶ୍ରୀ ଜଗନ୍ନାଥଙ୍କର ଏକ ମନ୍ଦିର
ପ୍ରତିଷ୍ଠା କରିଛି|
ଏଥିରେ ମୁଁ କମ୍ ଶାନ୍ତି ପାଇ ନାହିଁ| ଶ୍ରୀଜଗନ୍ନାଥଙ୍କ
ଚକା ଡୋଳା ଦେଖି ମୋ ଆତ୍ମା ତୃପ୍ତିରେ ପୁରି ଉଠେ|
ଓଡ଼ିଶାର ବଡ ଠାକୁର, ଜଗତର
ନାଥ ‘ଶ୍ରୀ ଜଗନ୍ନାଥ’
ଯାହାର ଆରାଧ୍ୟ ଦେବତା, ସେହି ଓଡ଼ିଆ କ’ଣ
କମ୍ ଭାଗ୍ୟବାନ୍|
ସେହି ଓଡ଼ିଆଙ୍କର ଜୟ
ହେଉ| ଓଡ଼ିଶାର ଜୟ ହେଉ|
ଜୟ
ଜଗନ୍ନାଥ|
Cardiologist, Houston, U.S.A.
Ph. No. : 0012813201014
କର୍ମଭୂମି କୁଏତ୍ରୁ କହୁଛି
ଶ୍ରୀ ଉପିଳ ଲୋଚନ ଚାନ୍ଦ
୨୦୦୧ ମସିହା, ମାର୍ଚ୍ଚ
ମାସ ୧୯ ତାରିଖ ସୋମବାର ସେହିଦିନ ମୁଁ ଦିଲ୍ଲୀ ବିମାନ ଘାଟିରୁ ସକାଳ ଘ ୫.୫୫ ମିନିଟ୍ରେ
କୁଏତ ଅଭିମୁଖେ ଉଡ଼ାଜାହାଜରେ ବାହାରି ଯାଇଥିଲି ମନରେ ମୋର କେତେ ଆଶା, କେତେ
ଆଶଙ୍କା ଭଦ୍ରକ,
ଓଡ଼ିଶା, ଦିଲ୍ଲୀ, ଭାରତର ସେ ସବୁ ଗୋଟିକ
ପରେ ଗୋଟିଏ ଉଭେଇ ଯାଉଥାଏ ମୋ ଆଖିରେ ‘ସଂଗୀତ’ ଜଗତରୁ
ମୁଁ ଯେପରି ଅନ୍ୟ ଏକ ଜଗତକୁ ବୋହି ଯାଉଛି ‘ସମୟର ସ୍ରୋତରେ’
ଜୀବନ ସଂଗ୍ରାମ ଏବଂ ସଂଗୀତ ଚର୍ଚ୍ଚା ମଧ୍ୟରେ ଯେପରି ଉବୁଟୁବୁ ହୋଇ ଯାଉଥିଲି
କୁଏତର ବିମାନଘାଟିରେ
ପହଞ୍ଚିଲି, ସେ ଦେଶର ସମୟରେ ସାତଟା ଦଶମିନିଟ୍ରେ ମୋତେ ଆମ (Indian Central
School) ସ୍କୁଲର ଡ୍ରାଇଭର ଆସି ମୋତେ ପାଛୋଟି ନେଲା ପ୍ରାୟ କୋଡ଼ିଏ ମିନିଟ
ମଧ୍ୟରେ ମୁଁ ପହଞ୍ଚିଗଲି Indian Central School କାର୍ଯ୍ୟାଳୟରେ
ତତ୍କାଳୀନ ଅଧ୍ୟକ୍ଷା ଶ୍ରୀମତୀ ଅଶା ଶର୍ମାଙ୍କୁ ସାକ୍ଷାତ କଲି ଆନୁଷଙ୍ଗିକ କଥାବାର୍ତ୍ତା ପରେ
ମୋ ପାଇଁ ରହିବାକୁ ସ୍ଥିର ହୋଇଥିବା ରୁମ୍କୁ ଗଲି ଦେଖିଲି, ସେଠାରେ
ସମସ୍ତ ବ୍ୟବସ୍ଥା ହୋଇଛି ମାତ୍ର, ନିକଟସ୍ଥ ହୋଟେଲକୁ ଖାଇବା ପାଇଁ ଯିବାକୁ ପଡ଼ିବ
ଏବେ ସେହି ଅଧ୍ୟକ୍ଷା
ବଦଳି ଶ୍ରୀମତି ଶାନ୍ତା ମରିୟା ଜେମ୍ସ୍ ଅଛନ୍ତି
ମୁଁ ଯେଉଁ Indian
Central School ରେ ସଂଗୀତ ବିଭାଗରେ ସଂଗୀତ ଶିକ୍ଷାଦାନ କରୁଛି, ଏହା
ଏକ ଘରୋଇ କମ୍ପାନୀ ଦ୍ବାରା ପରିଚାଳିତ ଏହାର ଛାତ୍ରଛାତ୍ରୀଙ୍କ ସଂଖ୍ୟା ପ୍ରାୟ ସାଢ଼େ ପାଞ୍ଚ
ହଜାର ଏବଂ ଶିକ୍ଷକ ଶିକ୍ଷୟତ୍ରୀଙ୍କ ସଂଖ୍ୟା ଅଢ଼େଇଶହ ହେବ
କୁଏତ୍ରେ ବାସ
କରୁଥିବା ଓଡ଼ିଆମାନେ ମିଶି ‘କୁଏତ ଓଡ଼ିଆ ଏସୋସିଏସନ’
ନାମରେ ଏକ ଅନୁଷ୍ଠାନ ଗଢ଼ିଛନ୍ତି ମୁଁ ଏହି ସଂସ୍ଥାରେ ୨୦୦୭ ମସିହା
ମଇ ମାସରେ ସଦସ୍ୟ ହେଲି ଏବେ ଏହାର ସଭାପତି ଇଂ. ଗିରିଜା ନନ୍ଦନ ପଣ୍ଡା ଓ ସଂପାଦକ ଅଛନ୍ତି ଇଂ.
ଉମେଶ ପଣ୍ଡା ଏହି ସଂସ୍ଥା ସବୁ ଓଡ଼ିଆ ଭାଷୀ ଲୋକଙ୍କୁ ଏକତ୍ର କରାଏ
ପ୍ରତିମାସର ତୃତୀୟ
ଗୁରୁବାର ଦିନ ଏହି ସଂସ୍ଥାରେ ଶ୍ରୀ ଜଗନ୍ନାଥ ପାଠଚକ୍ର, ଗୀତା ପାଠ, ହନୁମାନ
ସ୍ଖଳିଶା ପାଠ,
ବିଷ୍ଣୁ ସହସ୍ର ନାମ ଏବଂ ଲକ୍ଷ୍ମୀ ଅଷ୍ଟୋସ୍ତୋତ୍ରକମ୍
କାର୍ଯ୍ୟକ୍ରମ ସମସ୍ତଙ୍କୁ ଏକତ୍ର କରାଇଦିଏ| ଶେଷରେ ଅନ୍ନ, ଡାଲମା
ଓ ଖିରୀ ପ୍ରସାଦ ସେବନରେ କାର୍ଯ୍ୟକ୍ରମ ଶେଷହୁଏ| ଦୁଇବର୍ଷ ହେଲା
ଶ୍ରୀଜଗନ୍ନାଥଙ୍କ ରଥଯାତ୍ରା ଅନୁଷ୍ଠିତ ହେଉଛି
ଉତ୍କଳ ଦିବସ (ଏପ୍ରିଲ
ପହିଲା), ମହାସମାରୋହରେ ପାଳନ କରାଯାଏ ଓଡ଼ିଶାରୁ ବିଭିନ୍ନ ସମୟରେ ଏହି ଅବସରରେ ଡା. କବି ପ୍ରସାଦ
ମିଶ୍ର, ମହାଶ୍ବେତା,
ଶ୍ରୀ ପ୍ରଶାନ୍ତ ନନ୍ଦ, ଶ୍ରୀ କୁନା ତ୍ରିପାଠୀ ଓ ଅନୁ
ଚୌଧୁରୀ ପରି ବିଶିଷ୍ଟ ଜ୍ଞାନୀ ଓ ଅଭିନେତା ଓ ଅଭିନେତ୍ରୀମାନେ ଏଠାକୁ ଅତିଥି ହୋଇ ଆସିଥିଲେ
ଏହିବର୍ଷ ୨୦୧୩ ମସିହାରେ ଓଡ଼ିଶାର ଗଜପତି ଶ୍ରୀ ଶ୍ରୀ ଦିବ୍ୟସିହ ଦେବ ଓ ମହାରାଣୀ ଜେମାମଣି ଦେବୀ
ଅତିଥି ଭାବରେ ଯୋଗ ଦେଇ ସମବେତ ଓଡ଼ିଆମାନଙ୍କୁ ଉତ୍ସାହିତ କରାଇଥିଲେ
ସାଂସ୍କୃତିକ
କାର୍ଯ୍ୟକ୍ରମରେ ‘ବନ୍ଦେ ଉତ୍କଳ ଜନନୀ’
ସଂଗୀତ ସହିତ ନାଟକ, କବିତାପାଠ ଆଦି ପରିବେଷିତ
ହୋଇଥାଏ
ହୋଲି, ଦୀପାବଳୀ, ଗଣେଶ
ପୂଜା, ସରସ୍ବତୀ ପୂଜା ସହିତ ଦୁର୍ଗାପୂଜା ମଧ୍ୟ ବେଶ ଆଡ଼ମ୍ବର ସହକାରେ ପାଳନ କରାଯାଏ ନିକଟସ୍ଥ ‘ବାଂଲା
ଦେଶୀ’ ଓ ‘କଲିକତା ବେଙ୍ଗଲୀ ଆସୋସିଏସନ୍’ ସହିତ ମିଶି ଦୁର୍ଗାପୂଜାରେ ଆମ ଓଡ଼ିଆ ଭାଇ
ଭଉଣୀମାନେ ମିଶି ପୂଜାପାଠ ସହିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ବ୍ୟସ୍ତ ରହନ୍ତି
ଡିସେମ୍ବର ମାସରେ
କ୍ରୀକେଟ ଟୁର୍ଣ୍ଣାମେଣ୍ଟ ହୁଏ ଓ ଏଥିରେ ଷୋହଳଟି ଟିମ୍ ଭାଗ ନିଅନ୍ତି ଫାଇନାଲ କପ୍ ସିଲ୍ଡ
ଦିଆଯାଏ| କୁଏତରେ କ୍ରୀକେଟ ଟୁର୍ଣ୍ଣାମେଣ୍ଟ ଦିଗରେ ‘ଓଡ଼ିଶା କୁଏତ ଏସୋସିଏସନ୍’ର
ବେଶ୍ ସୁନାମ ରହିଛି
ଏଥି ସହିତ ଏହି ସଂସ୍ଥା
ଦ୍ବାରା ସ୍ବାସ୍ଥ୍ୟ ଶିବିର,
ରକ୍ତଦାନ ଶିବିର ମଧ୍ୟ ଅନୁଷ୍ଠିତ ହୁଏ
ଜଗନ୍ନାଥ ଭଜନ, ଭାରତୀୟ
ଦେଶାମିବୋଧ ସଂଗୀତ ତଥା ଆଧୁନିକ ଚଳଚ୍ଚିତ୍ର ସଂଗୀତ ମଧ୍ୟ ଏଠାରେ ଶିକ୍ଷାଦାନ କରାଯାଏ ବହୁ
ଓଡ଼ିଆ ଓ ଅଣ ଓଡ଼ିଆ ଛାତ୍ରଛାତ୍ରୀ ସଂଗୀତ ଶିକ୍ଷା କରି ଚଣ୍ଡିଗଡ଼ର ‘ପ୍ରାଚୀନ
କଳା କେନ୍ଦ୍ର’
ମାଧ୍ୟମରେ ସଂଗୀତ ପରୀକ୍ଷା ଦେଇ ଉତ୍ତୀର୍ଣ୍ଣ ହୋଇ ପ୍ରମାଣପତ୍ର
ପାଇଲେଣି
ପ୍ରାୟ ୧୩ ବର୍ଷ ହେଲା
- ‘Farwaniya’ ନାମକ
ଏକ ଭଜନ ମଣ୍ଡଳୀର ସଂଗୀତ ନିଦ୍ଦେର୍ଶକ ଭାବରେ ମୁଁ କାର୍ଯ୍ୟରତ ଏଠାରେ ପିଲାମାନେ ଭଜନ, ସମବେତ
ଭଜନ ସହିତ ବିଭିନ୍ନ ଯନ୍ତ୍ରସଂଗୀତ ମଧ୍ୟ ଶିକ୍ଷା କରୁଛନ୍ତି
ଏହି ଏସୋସିଏସନ୍ର
ସବୁଠାରୁ ଏକ ମହତ କାର୍ଯ୍ୟ ହେଲା - ଯେଉଁ ଭାଇ ବା ଭଉଣୀଙ୍କର କୁଏତ୍ରେ ଦେହାନ୍ତ ହୁଏ, ତାଙ୍କ
ମରଶରୀରକୁ ଜନ୍ମସ୍ଥାନ ଓଡ଼ିଶାକୁ ପ୍ରେରଣ କରିବା ଏହି ଶ୍ମଶାନ କ୍ଷେତ୍ରରେ ସବୁ ଆମେ ଏକ
ହୋଇଯାଉଁ ଯୋଡ଼ ହସ୍ତରେ ସେହି ଜଗନ୍ନାଥ ପ୍ରଭୁଙ୍କ ଚକାଡୋଳା ଦୁଇ ଆଖି ଆଗରେ ନାଚିଯାଏ ଆମେ
ଆର୍ତ୍ତସ୍ବରରେ ଡାକି ଉଠୁଁ - ଜୟ ଜଗନ୍ନାଥ !
Head
of the Deptt. Of Music
Indian
Central School, KUWAIT
Phone:
0096363389601.
ଜୟ ଜଗନ୍ନାଥ
ReplyବିଲୋପPls visit my Odia blog:
Replyବିଲୋପhttp://aamakalathakura.blogspot.in/